Era equipa de seguiment e contraròtle dera populacion d’ossi bruni (Ursus arctos) enes Pirenèus a enregistrat ena fin de junh imatges d’ua femelha e dus ossardets enes bòsqui deth Naut Àneu (Palhars Sobeiran), laguens dera zòna deth Parc Naturau deth Nauta Pirenèu. S’agís de dus ossardets neishudi en gèr, seguraments hilhs dera ossa Caramelles o dera sua hilha Plume.
Es imatges, que son es prumèrs en vidèo captadi enguan d’ossi en Pirenèu catalan, mòstren era abilitat des ossardets ara ora de mòir-se peth bòsc, en tot en·hilar-se damb seguretat sus eth tronc d’un arbe. Ara ora de baishar, era tecnica non ei tan depurada, encara qu’un d’eri non dobte en baishar de cap. Ei eth prumèr viatge qu’es tecnicians obsèrven aqueri movements mès pròpris d’un esquirol o d’ua marta en un des ossi deth Pirenèu.
Atanben, es tecnicians an observat aguesti dies a ua auta femelha damb un ossardet entre era zòna d’Arieja (França) e eth Baish Aran. Tanben en França, en Uston (Arieja), observèren a mitat de junh a ua auta femelha damb dus ossardets der an.
Era consolidacion dera preséncia der os brun en Pirenèu ei ua des tòques deth projècte Piroslife, impulsat pera Comission Europèa laguens des programes Life-Natura. Era tòca ei contribuïr ara aplicacion dera directiva comunautària tocant era conservacion dera natura entà mantier e melhorar es abitats naturaus e es espècies animaus e vegetaus d’interès comunautari des espacis designadi laguens deth Hilat Natura 2000.
Eth sòci coordenador deth projècte ei eth Departament de Territòri e Sostenibilitat, e tanben ne hèn part eth Conselh Generau d’Aran, Forestau Catalana, era Universitat de Lhèida e era Fundación Oso Pardo.
