Vielha, 2 de mai de 2017.- Aué s’a constatat ena Val d’Aran un atac der os Goiat a un potro pròp deth nuclèu de Vilamòs, en tèrme municipau deth madeish nòm.
Er atac, que s’a produsit aguesta net tàs 00:00 ores, a causat era mòrt d’un potro de dus dies de vida e a era singularitat d’èster eth prumèr atac d’os constatat a un cap de bestiar equin. Era mòrt deth potro a estat comunicada per un ramadèr vesin dera zòna e s’a pogut constatar era autoria gràcies ath seguiment GPS que se realize d’aguest mascle liberat hè lèu un an. Eth GPS a fixat damb exactitud era preséncia de Goiat en punt a a on s’a produsit er atac.
A causa deth tipe de movements que realize, se supause que Goiat pòt anar acompanhat d’ua ossa, en tot considerar qu’aguesta ei era epòca de zel d’aguesta espècia.
Es localizacions des darrères setmanes mòstren grani desplaçaments de Goiat cap a França e cap ath Pallars Sobirà, aguesti desplaçaments poiridien èster justificadi pera recèrca de femelhes en zel.
Aguest atac en municipi de Vilamòs place a Goiat nauaments enes Vals Centraus d’Aran a a on a estabilizat es sòns movements aguesti darrèri dies.
